Wenn mr ons o die Ereichnisse ei dr Familie derrennern, worsch halt a su. Sullt a Kendle of die Welt komme, wos ju immer drhem geschoh, dou wurd die Hebam, dos wor die Frau Kroboth, mir hon Krowoten geseht, gehullt. Wenn dos Tschoperle dann dowor, wur bald getauft, dou drfir wurn dann wider die gudn Kichle gebockn.

Bei Huchzetn dou wur schun rechtich gefeiert. Dos Brautpoor fuhr meist mit dr Kutsch ei die Kirch. Onderwags wur oft viergezeen, on dou mußt dar Breitigom erscht wos rausreckn, eh dr Wag wider freigahn wurd. Wenn die Vierzieer Kender vom, dou gobs halt Zockerlen, on fir die grußn Leit Gald. Noch dr Trauung gings erscht of Grulich zum Fotograph. Obr dou drnoch ging die Feierei mit vill gudm Assn on Trenkn lus. S wur vill gesonge on musiziert an monch Lostiches viergetreen.

Geburtstoch wur wull kamm gefeiert, ohr drfir dr Nomenstoch. Vill gratuliert krichtn halt die, wos Josef, Anna odr Marie hießn, denn seIle Toch worn ju jedm bekannt.

Tout jemand starbn, dou wur dar Tute meist drhem aufgebohrt. Weil mr ju ei dr Klann-Mohr ke Tocheszeitung hottn, mußtn die Leit durch Trauerzedl verstendicht warn.

Em Begräbnistoch wurd der Sorch vom Pforrer drhem ogehullt, on dr Leichenzuch ging dann ei die Kirch. Monchmol wor sugor Leichenmusich drbei. Nochm Requiem gings ofn Kirchhof wu ar dann begrobn wur. Henderhar wor obr immer a Trauerassn. Meist gobs Strizl on an gudn Kaffee. Bei am Begräbnis tout wull außer dr Verwandtschaft, aus jedm Haus vom Dorf jemand mitgiehn.