Bis etz wur vill vo dan Pauern drzehlt. Obr zu am gut funktionierden Dorf toutnju a die andem Eiwohner gehörn. Ei dr Klenn Mohr hotten mr ju fost alle Beruf vertratn. Dou wom die Teschler, Schuster, Schneider, Schmied, Bender, Wehner, Maurer, Zemmermon, Meller, Holzmocher,Stroßenremmer, Sottler, Friseer on mir hotten sugor an Dokter. Daan nahm mr obr blos fir die ernstem Sochn, obr dou verstond ar schun vill. Mutichen Leiten reß ar sugor die Zeen raus. Ei die Apothek brauchtn die Patientn nie gihn, denn onser Dokter tout die Medizin salber mochn. Wenn jemandem wos efoches fehln tout, do wurn halt die aldn Hausmettel ogewandt. Tout sich ehner bies stußn, kom Arnika drauf on a Fatsch dremrem, dou wurds schun wider gutt. Wenn jemand s Reißn hott, wur mit Franzbranntwein eigeriebn on gewärmt.

Hott ehner an orchn Hust, su a rechtiche Gauz, dou drgechn wur a Sirup aus Zwiefln on Kandiszocker gekocht. Wenn ar dos einohm worsch bald wiedr besser.

Die flessichn Fabrikleit dorf mr a nie vergassn. Die meisten hottn ju noch a bessle Fald,on em Stall stondn Ziechn on a Schwein on Hünner fittertn se meist a noch. Dann gabs noch Eisenbohner on Briefträger, dar mußt die Post vo dr Bohn met dr Rober huln on wos furtging a wider hiforn.

Gostheiser on Geschäft worn a dou, durt kunnt mr fost olles kriechn was su zum Laben gebraucht wur.

An Beck hottn mr a, dar taut die gudn Kifflen bocken.

Fleisch on Wurscht hultn mr bei Langer Karln. Durt gobs a die gude Mohrauer Wurscht, a Spezialitet die ar salber harstelln tot.

Ei die Stoodt braucht mr kam. Hechstens wenn neie Schuh odr a Uhr on was sonst nie alltägliches sein mußt, dou ging mr of Grulich. Ei Grulich war a zweemol em Jahr Jormert. Dar war em Frihjohr on em Herbst on dou mochten sich die Klann-Morrer a auf on ginge hie. Durt kunt mr ja allerhand kriechn.

Wenn a neies Kleed gebraucht wur, dou drfir wur dos Material ei Grulich odr ei Honnsdorf besorcht, on nähn touts dann em Dorf a Nehteren. Fir die Manne a neies Gewand wur immer vom Schneider gemocht. Dou mußt ogemassen on oproviert warn. Was tet dos wull heitzutoch kosten.

Em a neies Mebelsteck ging mr zum Teschler. Oft wur ju suwos nie gebraucht, denn s wur ju nischt wegeschmessn. Die Eirechtunge wurn immer wieder vererbt, obr hie on dou mußt halt doch was neies sein. Seis a Bettstadtle, a Olmer, a Kredenz, a Geschirrkastle, a Stockerle odr gor a Malkschemel. On sonst war die Kleene-Mohr a nie henderm Mond.

Wir hottn die Molkerei, wu aus dr ganzen Emgechend die Mellich vo dan Pauern hie geliefert wur. Frühzeitich fuhm schunn die Mellichfuhrleit, dou mußt bei dan Pauern metm Malkn schon gefedert warn, dos die Frühmellich noch mit kom. Wenn dann dar Mellichfuhrmon wieder zureck kom, brochtr ein Mellichkonne Molken on die bestellte PuttermeIlich, Putter on Käs mit. Die Putter on dr Käs wor ober ei am Vaschpertüchle ubn drauf gebondn.

Die Seidenfabrik vo Birken war zwar of Glasdörfer Grund, obr s ginge a vill Klann-Morrer hie. Dann hottn mr a a Gerberei. ViI warn sich noch ofn Kromp Gerber on o sei Sohn erennern kenne.

Die letztn Johr bis zum Krigg hottn mr sugor a kleene Gärtnerei. Durt kunntn die Kender firn Muttertag die Hortensien odr a schienes Zigeiner-Streichle kefn.

Fir dam bracht die Cyrillen die Kraut-on Solotpflanzn aus dr Stoodt.

A Postamt hottn mr a. Durt kunntn mir die Packlen on sonstiches aufgan. Fir eiliche Sochn wurn halt Telegramm aufgahn, denn a Telefon hottn zu dar Zeit noch nie vill Leit.

Sonst wurn halt immer Korten on Brief geschriebn.

An Bahnhof gobs ju a. Obr dos wor halt wull fir die meisten a zimlicher Wag bis mr durt wor. On dou mußt mr sich schun tummeln, doß am dr Zug nie noch fir dr Nos wegfuhr.

Em Summer fuhr mr ju vill metm Rod ei die nehere Emgechend, obr em Wenter worn die Leit schun of die Bahn ogewisn.

Die jengern Leit, die am Sonntich eis Kino wulltn, dos war ei Honsdorf on ei Grulich, fuhm se ebm mim Rod.

A Schandarmerie-Station hots a noch. Die wor immer gut besetzt. Dos hättn ruhich a poor Leit wincher geton, denn su bies worn mr doch nie.

Onserer Schul muß mr a a Lob aussprachn. Sie wor wull blos zwee-klassich, obr die Kender hon vo dan Lehrern trotzdam ihr Restzeich fürsch Labn mitkriecht.

Nie vergassen warn mr onser schiene Kirch. Wie vill Trust hon durt die Bater mitnahme kenne. Die wird wull immer ei onsern Herzn blein.